விந்தன் என்று அறியப்படும் கோவிந்தன் காஞ்சிபுரம் மாவட்டம் நாவலூரில் வேதாசலம், ஜானகி ஆகியோருக்குப் பிறந்தார். மாசிலாமணி முதலியார் நடத்திய “தமிழரசு” மாத இதழில்அச்சுக் கோர்ப்பவராகச் சேர்ந்தார். தமிழரசுக்குப் பிறகு ஆனந்த விகடன் அச்சுக் கூடத்தில் வேலை கிடைத்தது. ஆனந்த விகடனில் இருந்து வெளியேறிய பின்னர் கல்கி வார இதழில் சேர்ந்த கோவிந்தனுடைய அச்சுக் கோர்க்கும்திறமையைப் பாராட்டியதோடு, அவர் கதைகளும் எழுதுவார் என்பதை அறிந்து, “கல்கி” இதழில் தொடர்ந்து எழுதுமாறு கூறினார். சில மாதங்களில் துணை ஆசிரியராகவும் நியமித்தார். கல்கியின் துணை ஆசிரியராகச் சேர்ந்த விந்தன், குழந்தைகளுக்கு(பாப்பா மலர் பகுதியில்) “விஜி” என்ற பெயரில் பல கதைகள் எழுதினார். விஜி என்றபெயரை “விந்தன்” என்று பெயர் மாற்றிக் கொள்ளச் சொன்னவர் “கல்கி” கிருஷ்ணமூர்த்தி தான்.
1946 இல் விந்தன் எழுதிய “முல்லைக் கொடியாள்” என்னும் சிறுகதைத் தொகுப்பு நூல் வெளிவந்தது. தமிழக அரசின் தமிழ் வளர்ச்சிக் கழகம் அந்தத் தொகுதிக்கு முதல் பரிசை அளித்தது. விந்தனின் எழுத்துக்குத் தமிழ்நாட்டில் பெரும் வரவேற்புஏற்பட்டதால், “பொன்னி” மாத இதழ் ஆசிரியர், விந்தனைத் தொடர்களை எழுதுமாறு வேண்டினார்.“கண் திறக்குமா?” என்ற கதையை 1947ல் “நக்கீரன்” என்ற புனைப்பெயரில் எழுதினார். “பாலும் பாவையும்” என்ற கற்பனையும் கருத்தும் நிறைந்த தொடர் ஒன்றைஎழுதினார். “பாலும் பாவையும்” விந்தனுக்குப் பெரும் புகழைத் தேடித்தந்தது. ஏவி.எம்.நிறுவனத்தார், “பாலும் பாவை”யும் கதையைத் திரைப்படமாக்கவிரும்பியதால், கல்கி அலுவலகத்திலிருந்து பதவி விலகி, திரைப்படம் நோக்கிப் பயணித்தார்.சென்னை மாகாண முதலமைச்சராக இருந்த ராஜாஜி வைதீக மரபைத் தூக்கிப்பிடிக்கும் ‘பஜகோவிந்தம்’(1956) எழுதினார். இந்நூலுக்குப் புடைநூலாக‘பசிகோவிந்தம்’ (1956) என்ற நூலை விந்தன் எழுதினார் .
இவ்விரு நூல்களையும்வெளியிட்டவர் பெண்ணாடம் ராமசாமி. ஆர்.ஆர்.பிக்சர்ஸ் தயாரித்த ‘வாழப்பிறந்தவள்’ படத்துக்கு வசனமும், “அன்பு” என்ற படத்துக்கு வசனமும், ஒரு பாடலும், ‘கூண்டுக்கிளி’ என்ற படத்துக்கு வசனமும் எழுதினார். ‘குழந்தைகள் கண்ட குடியரசு’, ‘பார்த்திபன் கனவு’ திரைப்படங்களுக்கு வசனமும் பாடல்களும் எழுதினார்.கையில் கிடைத்த சொற்ப பணத்தைக் கொண்டு “புத்தகப் பூங்கா” என்ற பதிப்பகமும் “மனிதன்” என்ற மாத இதழையும் தொடங்கினார் விந்தன். “அன்பு அலறுகிறது”, “மனிதன் மாறவில்லை” என்ற இரு நாவல்களை எழுதினார்.அவர் மறைவுக்குப் பிறகு அவரது நூல்கள் நாட்டுடைமை ஆக்கப்பட்டன.